كلمات قصيدة الذهب | حامد زيد

كلمات قصيدة الذهب | حامد زيد ، يا كثر ما رافقت خلان وأحباب ، حامد زيد

 

يا كثر ما رافقت خلان وأحباب

ويا كثر ما في شدتي هملوني

على كثر ما أعدهم ستر وحجاب

على كثر ما احتجتهم وتركوني

من صارت الخوة ثمن حفنة تراب

نفس الوجيه اللي نصوني .. نسوني

من غير ذكر فروق، وعروق، وأنساب

كانوا ثلاثة .. والثلاثة جفوني

علمتهم وشلون الأهداف تنصاب

ولما سواعدهم قوت .. صوبوني

عشاني أصغرهم عمر صاروا أحزاب

عشاني أصدقهم قصيد إظلموني

اللي نجاح اسمي زرع فيهم أنياب

حتى النصيحة ما بغوا ينصحوني

دام العطايا عندهم دين وأتعاب

والله لو أطلب ذنبهم ما عطوني

طالب نصيحة، كني طالب أرقاب

وهي نصيحة! كيف لو زوجوني؟

كنت أكتب لنفسي مشاريه وعتاب

ولا أدري إن اللي قروني… قروني

تضاربت من دوني عقول وألباب

واجد بغوا غيري .. وواجد بغوني

أقفل هدب .. تسهر على شعري أهداب

كني حبست إرقادهم في جفوني

لو شفتهم واحد .. يشوفوني أسراب

من وين مالدوا نظرهم لقوني

أثري وجودي بينهم محرق أعصاب

ومزعل بعضهم من بعض لو طروني

يا كبري بعيني وأنا توني شاب

وأهم كتّاب الشعر حاربوني

حتى ولو يهوي على نجمي شهاب

يكفيني أن اسمي كبير بعيوني

كد قال أبوي: أن هبتهم قول: ما هاب

لو يقدرونك قول: ما تقدروني

ما دام قبري محتضن راس مرقاب

على كثر ما تقدرون ادفنوني

لو ماني بذيب إنهشت عظمي ذياب

لو ما عرفت أثبت وجودي لغوني

لو ما سكنت وجيههم مت بغياب

لو ما قدرت أمحي ورقهم محوني

أصبحت الأصعب لأنهم كانوا أصعاب

جننتهم مثل ما جننوني

ماجيت أبدبل كبدهم شعر وخطاب

لين أدبلوا كبد الذي خلفوني

يا ويل وجهي كن للدمع مخلاب

ما جف ماه ولا إستحى من طعوني

كل ما طرالي منظر مريب وأرتاب

كان الوحيد اللي يحرك شجوني

قبلة صلاة، وذكر، وخشوع، وكتاب

وأمي على سجادة النور دوني

تدعي لي الله يفتح بوجهي أبواب

تتوسله بالشدّة يكون عوني

من كثر ما خفاقها بالدعاء ذاب

صارت تحس إن زملاي أكرهوني

بشرتها: يمه معي ربع وأصحاب

ماني لحالي واجد اللي يبوني

من يوم ما حاز قلمي كل الألقاب

قلطتهم في دفتري وأحفظوني

الله وهبنيهم بني عم وأجناب

من يوم جيت أعجبتهم وأعجبوني

وإعجابهم فيني ما هو بأية إعجاب

بأسلوبي، بشرحي، بطرحي، بلوني

لو قلت عن نفسي ( بشر ) .. صرت كذاب

لو قلت: (دمي من ذهب) صدقوني

لو بكيفهم كان ازرعوا دربي أعشاب

لو بيدهم يتشبهون أشبهوني

من كثر ما صاروا من طبوعي أقراب

حتى بلبسة شمغهم قلدوني

واجد دعوني وأغلقوا دوني الباب

وأكثار ناس أبكي لهم ما بكوني

لو طالوا لهدمي مناسيب وأطناب

كان وغلاتك من زمان إهدموني

مدام حطوا فيني عيوب وسباب

جنبت عنهم مثل ما جنبوني

أصلاً لو أن بخوتي شي ينعاب

ذبحت نفسي قبل لايذبحوني

أنا يدي لو ماكست متني ثياب

نذر ٍعلى لقطع يدي من متوني

مو عيب أجي مدعو ولا أشوف ترحاب

العيب لو أني رجعت إن دعوني

مادمت اجي ولا يحسبون لي حساب

حرّمت أروح إذا يبوني يجوني